Agar Ae Naseem-e-sehar Tera Ho Guzar Dayar-e-hijaz Mein

Agar ae naseem-e-sehar tera ho guzar dayar-e-hijaz mein

Meri chashm-e-tar ka salam kehna huzoor-e-banda nawaz mein

Tumhein had-e-aqal na paa saki fakat itna haal bata saki

Ke tum aik jalwa-e-raaz the jo nahan hai rang-e-majaz mein

Na jahan mein raahat-e-jaan mili, na mataa-e-aman o amaan mili

Jo dawaye dard-e-nahan mili, to mili behisht-e-hijaz mein

Ajab aik suroor sa chha gaya meri rooh o dil mein sama gaya

Tera naam naaz se aagaya mere lab pe jab bhi namaz mein

Karoon nazr naghma-e-jaan-faza mein kahan se akhtar-e-bay-nawa

Ke siwaye naala-e-dil nahi mere dil ke ghamzada saaz mein