Afsos! Bohat Door Hoon Gulzaar-e-Nabi Se
Afsos! Bohat Door Hoon Gulzaar-e-nabi Se
Afsos! bohat door hoon gulzaar-e-Nabi se
Kaash aaye bulaawa mujhe darbaar-e-Nabi se
Ulfat hai mujhe gesoo-e-khamdaar-e-Nabi se
Abroo o palk aankh se rukhshaar-e-Nabi se
Pairahan o chaadar se asaa se hai mohabbat
Na’lain-e-shareefain se dastaar-e-Nabi se
Busairi! mubarak ho tumhein burd-e-Yamaani
Saugat mili khoob hai darbaar-e-Nabi se
Beemaar! na mayoos ho tu husn-e-yaqeen rakh
Dam ja ke kara le kisi beemaar-e-Nabi se
Tu khwab mein Hasnain ke sadqe mein Khudaaya
Farma de musharraf mujhe deedaar-e-Nabi se
Allah ko maane jo Muhammad ko na maane
La raib woh naari hua inkaar-e-Nabi se
Woh naar-e-jahannam ka hai haqdar yaqeenan
Hai jisko adawat kisi bhi yaar-e-Nabi se
Ae zaair-e-Tayyiba! ye dua kar mere haq mein
Mujh ko bhi bulaawa mile darbaar-e-Nabi se
Duniya ke nazaron se bhala kya ho sarokaar
Ushshaaq ko bas ishq hai gulzaar-e-Nabi se
Deewanon ke aansoo nahin thamtay dam-e-rukhsat
Jab soo’e watan jaate hain darbaar-e-Nabi se
Jalwon se Khudaaya mera seenah ho Madinah
Aankhen bhi hoon thandi meri deedaar-e-Nabi se
Sunnat hai safar deen ki tableegh ki khaatir
Milta hai humein dars yeh asfaar-e-Nabi se
Mastaana Madine mein Khuda aisa bana de
Takkra ke main dam toor doon deewaar-e-Nabi se
Sadqe mein mere Ghous ke ho door andhera
Turbat ho munawwar meri anwaar-e-Nabi se
Jab qabr mein aayenge to qadamoon mein girunga
Khoob aankhen miloonga main to paizaar-e-Nabi se
Attar hai imaan ki hifazat ka sawaali
Khaali nahin jaayega yeh darbaar-e-Nabi se