Ae Kaash! Tasawwur Mein Madine Ki Gali Ho
Ae Kaash! Tasawwur Mein Madine Ki Gali Ho
Ae kaash! Tasawwur mein Madine ki gali ho
Aur yaad-e-Mohammad bhi mere dil mein basi ho
Do soz-e-Bilal aaqa mile dard-e-Raza sa
Sarkaar 'ataa ishq-e-Owais-e-Qarni ho
Ae kaash! Main ban jaon Madine ka musafir
Phir rooti hui Tayyaba ko baraat chali ho
Phir rahmat-e-Baari se chalun sooye Madina
Ae kaash! Muqaddar se muyassar woh ghari ho
Jab aoon Madine mein to ho chaak gareban
Aankhon se barasti hui ashkon ki jhari ho
Ae kaash! Madine mein mujhe maut yun aaye
Chaukhat pe teri sar ho meri rooh chali ho
Jab le ke chalo gor-e-ghareeban ko janaaza
Kuch khaak Madine ki mere munh pe saji ho
Jis waqt Nakeerain meri qabr mein aayein
Us waqt mere lab pe saji naat-e-Nabi ho
Allah! Karam aisa kare tujh pe jahaan mein
Ae Dawat-e-Islami teri dhoom machi ho
Sadqa mere Murshid ka karo door balaayein
Ho behtari us mein jo bhi armaan-e-dili ho
Allah ki rahmat se to jannat hi milegi
Ae kaash! Mahalley mein jagah un ke mili ho
Mahfuz sada rakhna Shah! Be-adabon se
Aur mujh se bhi sarzad na kabhi be-adabi ho
Attar hamara hai sar-e-Hashr ise kaash!
Dast-e-Shah-e-Bat'ha se yehi chitti mili ho