Adam Se Laai Hasti Ko Aarzoo'e Rasool

Adam se laai hasti ko aarzoo'e Rasool

Kahan kahan liye phirti hai jastju'e Rasool

Khushha wo dil ke ho jis dil mein aarzoo'e Rasool

Khushha wo aankh ho jo mahv husn roo'e Rasool

Talash naqsh kaf paye Mustafa ki qasam

Chune hain aankhon se zarraat khaak boo'e Rasool

Phir un ka nasha irfaan ka poochhna kya hai

Jo pi chuke hain azal mein mai'e saboo'e Rasool

Balain loon teri ae jazb-e-shauq salli ala

Ke aaj daaman khich raha hai soo'e Rasool

Shagufta gulshan-e-Zahra ka har gul tar hai

Kisi mein rang Ali aur kisi mein boo'e Rasool

Ajab tamasha ho maidan-e-mahshar mein Baidam

Ke sab hon paish Khuda aur main barru'e Rasool