Abd-e Aajiz Ko Hai Shauq-e Raqam-e Naat-e Rasoolؐ
Abd-e Aajiz Ko Hai Shauq-e Raqam-e Naat-e Rasoolؐ
Abd-e aajiz ko hai shauq-e raqam-e naat-e Rasoolؐ
Zehan-e Hassaanؓ! Idhar bhi ho tawajjo Mabzool
Tere ashaar mein mehfooz hai paikar unka
Tere afkaar pe hai saaya kunaan zulf-e Rasoolؐ
Teri aankhon mein hain raqsan woh manazir saare
Tu ne dekhi woh jabeen aur woh chashm-e makhool
Tere daman se mujhe un ki mehak aati hai
Teri fitrat mein hai beshak usi khushboo ka hulool
Tu ne us zaat-e graami ka zamana paaya
Teri tauseef mein Jibreel-eؑ ameen ka hai shamool
Minbar-e naat ki tu ne hi sadarat paayi
She'r tere saf-e ada pe the saif maslool
Narm lehje mein woh baatein, woh tabassum unka
Hafize mein tere maujood hain woh rang, woh phool
Zang-e isyaan se mire dil ka hai aaeena siyaah
Par too-e noor se hai teri jabillat masqool
Ik zara us Sheh-e khoobaan ke khudokhaal bata
Jis ka jalwa tere ashaar ki hai shaan-e nuzool
Woh ke khursheed-e azal hai ba sar-e charkh-e wajood
Jise laahik nahin taa shaam-e abad khauf-e uful