Aaj Ashk Mere Naat Sunain To Ajab Kya

Aaj ashk mere naat sunain to ajab kya

Sun kar woh mujhe paas bulain to ajab kya

Un par to gunah gaar ka sab haal khula hai

Is par bhi woh daaman mein chhupain to ajab kya

Munh dhaanp ke rakhna ke gunah gaar bohat hoon

Mayyat ko meri dekhne aain to ajab kya

Deedaar ke qabil to nahin chashm-e-tamanna

Lekin woh kabhi khwab mein aain to ajab kya

Na zaad-e-safar hai na koi kaam bhale hain

Phir bhi mujhe sarkaar bulain to ajab kya

Haasil jinhein aaqa ki ghulami ka sharaf hai

Thokar se woh murdon ko jilaain to ajab kya

Woh husn-e-do aalam hain Adeeb unke qadam se

Sehra mein agar phool khil aain to ajab kya

Aaj ashk mere naat sunain to ajab kya

Sun kar woh mujhe paas bulain to ajab kya