Aah! Shah-e-behr O Bar! Mein Madina Chhor Aya
Aah! Shah-e-behr O Bar! Mein Madina Chhor Aya
Aah! Shah-e-behr o bar! mein Madina chhor aya
Koh-e-gham pada sr par, mein Madina chhor aya
Aah! Masjid-e-Nabwi, haye Gunbad-e-Khazra
Aah! Rozah-e-Anwar, mein Madina chhor aya
Gham ke cha gaye badal, dil mein mach gayi halchal
Aah! Ae mere yavar! mein Madina chhor aya
Jab chala tha Taiba ko, thi khushi mere dil ko
Aah! Ab hai dil muzdar! mein Madina chhor aya
Dil mein beqarari hai orgiryah tari hai
Beh rahi hai chashm-e-tar, mein Madina chor aya
Chhup gaya nigahon se, aah! sab Madine ka
Dilkash o haseen manzar, mein Madina chhor aya
Qalb parah parah hai, hijr-e-shah ne mara hai
Aah! Mere chaarah gar! mein Madina chhor aya
Ab gham-e-Madina se, chaak chaak seena hai
Kyun kahoon na ro ro kar, mein Madina chhor aya
Lutf jo hai Taiba mein vo kahan vatan mein hai
Kya karun ga ja kar ghar, mein Madina chhor aya
Lot kar na mein aata, kaash! jaan de deta
Gir ke khaak-e-Taiba par, mein Madina chhor aya
Aah! din Madine ke, jald jald guzre the
Haye jald chhuta dar, mein Madina chhor aya
Din ko bhi suroor aata, shab ko bhi zarur aata
Kya fiza thi kaif aawar, mein Madina chhor aya
Tha vahan samaan noori, ranj o gham se thi doori
Aah! Noor ke paikar! mein Madina chhor aya
Waqt-e-hijr jab aya, phoot phoot kar roya
Dard naik tha manzar, mein Madina chhor aya
Hijr ka hai sadma aur seena o jigar mere
Rakh ke qalb par pattar, mein Madina chhor aya
Hijr ke mein sadmon se, choor choor zakmon se
Chal raha tha ro ro kar, mein Madina chhor aya
Jab Madina chhuta tha gham ka koh toota tha
Jaan o dil liye muzdar mein Madina chhor aya
Sabz gunbad aur mainar, aah! chhut gaye Sarkar
Phir bulaiye Sarwar, mein Madina chhor aya
Tha gham-e-Madina mein, furqat-e-Madina mein
Dil mera bahut muzdar, mein Madina chhor aya
Mere haami o hamdam! door hon jahan ke gham
De do apna gham Sarwar! mein Madina chhor aya
Dil mein hai pareshani, ho karam ae Sultani
Aao khwab mein Sarwar! mein Madina chhor aya
Dil ki hai ajab haalat, sadma o gham-e-furqat
Al-firaaq ae Sarwar! mein Madina chhor aya
Chal diya safina hai chhut gaya Madina hai
Haye! kya karun Sarwar mein Madina chhor aya
Gham ki ho gaya tasveer, aah! hijr hai taqdeer
Chup hua hoon ro ro kar! mein Madina chhor aya
Door ho gaya Sarkar! aah! ghamzada Attar
Jald aaun phir dar par, mein Madina chhor aya